CENTRAL VISAYAS- Nasikop sa kapulisan sa Police Regional Office 7 ang anaa sa 298 ka mga indibidwal atul sa ‘simultaneous operation’ nga gilusad gikan sa Septiyembre 9 hangtod 12, 2024, sa Central Visayas.
Sa mga dinakpan, anaa sa 103 ang mga drug suspects lakip na ang high-value ug street level nga mga indibidwal diin nasakmit sa mga operatiba ang kinatibuk-ang 2,536.54 gramos sa gituohang shabu nga adunay standard drug value nga PhP17,248,472.00.
Nasakmit usab ang ubang drug paraphernalia.
Sa laing bahin, nasikop sa illegal gambling operations ang anaa sa 111 ka mga suspek ug nasakmit ang PhP7,349.00 nga total bet money samtang ang loose firearm operations miresulta sa pagkasikop sa unom (6) ka mga suspek ug narekober ang 83 ka wala ma-rehistrado nga armas.
Dugang pa, ang nag-ung-ong nga warrant of arrest ngadto sa walo ka most wanted persons ug 70 ka uban pang wanted persons anaa na sa kustodiya sa kapulisan pinaagi sa pagpatuman sa court-issued warrants of arrest.
Ang tanang mga ebidensiya nga nasakmit gikan sa mga operasyon gisumite na ngadto sa Forensic Unit alang sa eksaminasyon ug ang tanang nasikop nga mga suspek kasamtangang gitanggong sa kustodiya alang sa tukmang pagpasaka og kaso sa korte.
Gidayeg usab ni PBGEN ANTHONY A ABERIN, Regional Director, PRO 7, niya ang mga operatiba nga nalambigit sa malampusong paglusad sa mga operasyon nga miresulta sa dakong kalamposan sa PRO7.(PRO7-PIO)
