Gikumpirmar sa Department of Budget and Management (DBM) nga ang gobyerno adunay P238 bilyon nga pondo aron matubag ang epekto sa oil shock nga nasinati sa nasud.
Atol sa hearing sa LEAD Committee sa House, si Acting Budget Secretary Rolando Toledo miingon nga ang pondo maggikan sa 2026 budget ug padayon nga appropriations sa administrasyong Marcos.
Gipasiugda ni Toledo nga ang gobyerno mag-tutok sa targeted assistance imbes nga kaylap nga subsidyo aron masiguro nga ang tabang makaabot sa mga sektor nga labing huyang sa krisis.
Sa pagkakaron, P3.5 bilyon ang gipagawas alang sa transportasyon ug P10 bilyon nakatagana sa presidential assistance sa mga sektor sa agrikultura ug pangisda.
Gawas sa transportasyon ug pagkaon, ang pag-apod-apod sa financial assistance pinaagi sa AICS program ug suporta para sa mga OFW nagpadayon usab.
Gipasalig sa DBM sa mga magbabalaod ubos ni Speaker Bojie Dy III ug Representative Miro Quimbo nga ang gobyerno andam nga palapdan ang mga safety-net program sama sa TUPAD kung mograbe ang sitwasyon sa global oil market.
