Girespeto sa Philippine National Police (PNP) ang desisyon ni Presidente Ferdinand R. Marcos Jr. nga i-veto ang balaudnon nga nagpasiugda og reporma sa han-ay sa Kapulisan.
Sa usa ka pamahayag, ang PNP nagkanayon nga ilang nasabtan ang mga kabalaka ni Marcos Jr., mahitungod sa pagmintinar sa kaangayan sa kompensasyon sa mga Pulis.
Makaapektar usab sa burukrasya sa han-ay sa Kapulisan bisan ang posibleng risgo sa seguridad.
Gipasalig usab sa PNP nga ilang konsiderahon ang mga obserbasyon sa Presidente ug makig-alayon sa administrasyon ingon man sa Kongreso sa pagpanday ug mas tukma nga balaod nga magpalig-on sa han-ay sa Kapulisan inay manghilabot.
Giinsistir pa sa PNP nga ang bisan unsang reporma nga makapauswag sa ilang operasyon ug makadugang sa pagsalig sa publiko dawaton alang kanila aron sila magpabiling lig-on sa pagserbisyo ug pagpanalipod sa mga Pilipino.
Ingon man nga magpadayon sila sa pagpalig-on sa pagpatuman sa balaod, pagmintinar sa propesyonalismo sa ilang han-ay ug masaligon sila nga makab-ot nila ang mas epektibong reporma pinaagi sa bukas ug hiniusang lakang.
