Personal nga mibisita si Presidente Ferdinand Marcos Jr. sa Naga City aron susihon ang mga proyekto ubos sa Oplan Kontra Baha, usa ka inisyatibo sa pagpamenos sa baha sa nasudnong gobyerno.
Giubanan siya sa pagbisita ni Mayor Leni Robredo, kanhi Bise Presidente ug kanhi kaatbang sa pagkapresidente.
Ingon man nga anaa usab ang presensya ni Public Works Secretary Vince Dizon.
Sa iyang pamahayag, gipasiugda ni Marcos nga ang biyahe naka-focus sa serbisyo publiko ug dili sa politika, bisan pa sa mga espekulasyon sa posibleng alyansa sa umaabot nga 2028 Elections.
Bisan tuod iyang giinsistir nga ang pagbisita dili politikal, gipakita sa Presidente sa mga nanambong ang iyang pink nga medyas, giingong isip “pagpasidungog” kang Mayor Robredo, kinsa migamit sa color pink sa iyang kampanya sa pagkapresidente sa 2022.
Gipangulohan sa Presidente ang inspeksyon sa mga agianan sa tubig ug mga sistema sa drainage sa Naga, nga kabahin sa multi-agency desilting ug rehabilitation program aron mapalig-on ang sistema sa pagkontrol sa baha sa siyudad.
Gihimug-atan ni Marcos nga serbisyo una, ug dili politika busa gipasiugda nga ang ilang kolaborasyon naka-focus sa kaayohan sa mga residente sa Naga.
Gitawag sa Presidente ang lihok sa pagsul-ob og pink nga medyas nga mao ang “labing politikal nga butang” nga iyang gibuhat niadtong adlawa, apan miinsistir nga ang tibuok pagbisita “hugot nga trabaho.”
Ang pagbisita nahitabo taliwala sa mga estorya bahin sa posible nga bag-ong alyansa sa politika, apan si Marcos ug Robredo miinsistir nga ang ilang kolaborasyon naka-focus sa serbisyo publiko ug pagpangandam sa katalagman.
Ang pagbisita ug lihok sa pagsul-ob og pink nga medyas giisip sa pipila ka mga tigpaniid isip simbolo sa pagtahod.
