Nanawagan ang pipila ka labor groups sa pag-resign ni Baguio City Mayor Benjamin Magalong human siya gitudlo ni Presidente Ferdinand Marcos Jr. isip special adviser ug imbestigador sa bag-ong natukod nga Independent Commission for Infrastructure (ICI) aron tutukan ang mga kaso sa korapsyon sa mga proyekto sa imprastraktura sa gobyerno gahapong adlawa, Domingo.
Matod sa Nagkaisa Labor Coalition, samtang giila ang integridad ug dedikasyon ni Magalong, ang iyang mga katungdanan isip mayor ug isip imbestigador sa ICI kinahanglan nga dili mahiusa ug magdungan.
Dugang pa sa grupo nga si Magalong mahimong magpabilin isip adviser o full-time nga imbestigador, busa kinahanglan nga mo-resign siya isip mayor.
Gikutlo usab sa grupo ang Section 7, Article IX-B sa 1987 Constitution, nga nagdili sa mga piniling opisyal nga matudlo sa ubang mga posisyon sa gobyerno atol sa ilang termino. Gipaluyohan kini sa Korte Suprema sa kaso ni Flores batok Drilon (1993).
Wala pa motubag si Magalong sa maong tawag, apan sa usa ka pamahayag niadtong Sabado, siya nagkanayon nga magpabilin siya isip mayor sa Baguio City samtang nag-abag sa ICI.
Matod sa iyang kampo, dili siya miyembro sa komisyon, apan mosumiter lang siya og mga ebidensiya ug mga dokumento nga iyang kolektahon isip kabahin sa imbestigasyon niini.
Angayang masayran nga una nang gipahibalo sa Malacañang ang unang duha ka sakop sa ICI nga sila si kanhi DPWH Secretary Rogelio “Babes” Singson ug Rossana Fajardo sa auditing firm nga SGV. Ang ikatulo nga miyembro, nga mahimong tsirman sa komisyon, ipahibalo sa umaabot nga mga adlaw.
Samtang, si Ako Bicol party-list Rep. Zaldy Co, kinsa usa sa nalambigit sa anomaliya sa kontrobersiya sa pagbaha, nikuwestiyon sa kawalay pagpihig ni Magalong human kini giingong mihatag og pamahayag sa media batok kaniya.
