CEBU CITY-Wala’y angay ikabalaka ang katawhan sa pagdagsa sa mga nagkadaiyang isda sa pipila ka mga baybayon sa Sugbo.
Kini ang gitino ni Mario Ruinita, direktor sa Bureau of Fisheries and Aquatic Resources (BFAR), Central Visayas, nga ang isdang lupoy nga nidagsa sa baybayon sa habagatang lungsod sa Ginatilan kaniadtong Valentine’s Day usa ka butang nga dili angay kabalak-an.
Gitino niini, nga kinsa usa ka positibong epekto sa 60 ka adlaw nga ‘closed season’ sa pangisda nga gipahamtang sa kadagatan sa kabisay-an.
Dugang pa, nga dili kinahanglan nga mabalaka ang katawhan, gumikan kay normal ra kini, ilabi na nga musulod na ta sa summer season diin daghan ang isda.
Gipasabot niini nga ang pag-abut sa mga isda sa baybayon, gumikan sa pagka-disorient niini samtang naggukod sa ilang pagkaon.
Giklaru pa sa opisyal nga luwas kan-on ang maong mga isda basta kay lab-as lamang.
Kung kahinumduman ang mga residente sa Poblacion sa baybayon sa Ginatilan gisugat sa lunop sa isda nga nailhan sa Cebuano nga “lopoy” o juvenile sardine, “tuloy” o “mangsi” niadtong Miyerkules o usa ka adlaw sa wala pa gilibkas sa bureau ang fishing ban.
