CEBU CITY-Mipahigayon ang Pagkakaisa ng mga Samahan ng Tsuper at Operator Nationwide Cebu Chapter (PISTON Cebu) og tulo ka managlahing protesta batok sa Oil Price Hike (OPH) ug PUV Modernization Program (PUVMP) sa milabay nga adlaw’ng Lunes, Oktubre 24, 2023.
Kung diin gipahigayon sa mga sakop sa PISTON ang protesta sa Barangay Mabolo sa dakbayan sa Sugbo dungan sa ilang mga kauban sa Mandaue ug sa dakbayan sa Lapu-Lapu.
Gipanawagan sa grupo ang pagbasura sa Oil Deregulation Law, ang pagwagtang sa VAT ug excise tax sa mga produkto sa lana, ang nasyonalisasyon sa Petron aron makontrol ang industriya sa lana, ug ang pag-abandonar sa PUVMP.
Mao kini ang gibutyag ni Greg Perez, ang pangu sa PISTON-CEBU.
Matod niini nga daw wala nadungog sa gobyerno ang ilang gipangayo sa pagtangtang sa value-added tax (VAT) ug excise tax sa lana.
Kung diin, ubos sa Tax Reform for Acceleration and Inclusion (TRAIN) Law, ang excise tax sa gasolina kay P4.50 matag litro.
Hinungdan nga mokabat sa P40.00 nga tax ang ilahang gibayran matag litro sa produktong petrolyo.
Matud usab ni Perez nga dili paigo sa mga drayber ang P6,500 nga fuel subsidy nga gitakda sa Department of Budget and Management (DBM), ug gani, mas dako pa ang kantidad nga ilahang gibuhis matag bulan kung itandi sa maong ayuda.
Gisaway usab niini nga kutob lang pagkolekta sa mga tax sa kabus ang kagamhanan gumikan kay daghan nga tax ang wala gi-kolekta sa gobyerno gikan sa mga dagkong negosyante ug politiko.
