Nagpasalamat si Jail Director Efren Altamira Nemeño sa tanang jail officers, non-uniformed personnel, partner agencies, ug public service partners sa ilang walay hunong nga pasalig ug suporta, kini atol sa selebrasyon sa ika-35 nga annibersaryo sa BJMP-7.
Matod niya nga ang mga pagbag-o ug kalamboan nga nahimo sa kinabuhi sa mga Persons Deprived of Liberty (PDL) dili makab-ot sa BJMP lamang, kondili pinaagi sa kolaborasyon ug kooperasyon sa nagpadayon nga mga programa ug kalihokan.
Gipasiugda usab ni Direktor Nemeño ang pipila sa mga kalampusan ug inobasyon nga gipatuman karon, lakip na ang computerization sa Jail Commissary sa Cebu City Jail Dormitory nga karon naggamit na og QR codes, debit, ug credit systems aron mapanalipdan ang interes ug katungod sa mga PDL.
Dugang pa, abli na karon ang oportunidad para sa mga kwalipikadong PDL nga mokuha sa Civil Service Examination sulod sa prisohan, uban sa pagpaambit sa ehemplo sa usa ka kanhing PDL nga nakakompleto sa training program ug karon usa na ka regular nga empleyado sa usa ka dakong hotel sa Cebu.
Pinaagi sa pag-atubang sa mga hagit sa umaabot ug kakulang sa mga pasilidad, gitapos ni Direktor Nemeño ang iyang mensahe pinaagi sa pag-awhag sa tanan nga ipadayon ang pagpanalipod sa hustisya ug pagbag-o sa kinabuhi sa mga nabilanggo.
Iyang gipasabot nga ang tinuod nga mga resulta makab-ot pinaagi sa mga pamaagi nga tinuod nga makita ug mabati sa tanan, aron ang matag prisohan magsilbing dapit sa hustisya, pagkamay-tulubagon, ug pagbag-o alang sa kaayohan sa katilingban.
