-- ADVERTISEMENT --

Gikompirmar ni President Ferdinand “Bongbong” Marcos Jr. nga walay nahitabong pagpirma sa gisugyot nga “Pax Silica Initiative” atol sa pagbisita ni US President Donald Trump dinhi sa Pilipinas.

Sa dili pa ang ilang bilateral nga panagtagbo sa Malacañang, gipangutana sa mga tigbalita si Marcos kon aduna bay pirmahan nga framework agreement alang sa maong inisyatiba nga gipangulohan sa Estados Unidos.

Mubo nga mitubag ang Presidente nga wala kini gilakip sa agenda sa kasamtangang pagbisita sa lider sa Amerika.

Kining maong pamahayag nagpalig-on sa una nang pahibalo ni US Ambassador to the Philippines Lee Lipton nga walay kasabotan nga pirmahan.

Giklaro usab ni Marcos nga dili kini mahimong kabahin sa ilang mga hisgotanan sa miting.

-- ADVERTISEMENT --

Bisan pa niini, gipadayag sa mga opisyal nga nagpadayon gihapon ang negosasyon.

Matod ni Philippine Ambassador to the United States Jose Manuel Romualdez, kinahanglan pa nga husayon sa duha ka nasod ang mga teknikal nga detalye sa dili pa kini hingpit nga mapinalisar.

Una nang gibutyag ni Department of Trade and Industry (DTI) Undersecretary Ceferino Rodolfo nga nagpabilin ang tumong nga mapirmahan ang legal framework alang sa Pax Silica nga nagtutok sa pagpalig-on sa supply chain sa semiconductors ug artificial intelligence sa dili pa matapos ang tuig 2026.