Gilaumang makapa-ugmad sa lalawigan sa Bohol ang pagtugyan sa Panglao International Airport sa pribadong sektor ngadto sa Aboitiz InfraCapital (AIC) karong buwan sa Hunyo ning kasamtangang tuig.
Sigon sa AIC, ang pagtugyan sa pagdumala sa maogn tugpahanan kay makapatukod og mga upgrades sa terminal niini nga makadugang sa ihap sa turismo ug regional development sa lugar.
Gikataho sa Philippine Statistics Authority (PSA) niadtong Disyembre 2024, nga ang pagsaka sa Gross Domestic Product (GDP) sa Bohol sa tuig 2023 ngadto sa 6.6% kay labaw sa national average nga 5.5% nga naghulagway sa baskug nga pagtubo sa ekonomiya sa lalawigan.
Sa susamang report sa PSA, ang sektor sa transportasyon ug pamodega kay mitubo ngadto sa 20.4% nga nagpakita sa kaandam sa Bohol sa paghangop sa mutaas nga ihap sa turista ug ubang kalihokan sa patigayon.
Sa maong paghangop sa AIC sa Panglao-Bohol International Airport sulod sa 30 ka tuig nga kontrata, malakip kini sa 3 ka mga airports sa nasud nga gidumala sa maong kumpanya sama sa sama sa Mactan-Cebu International Airport sa Cebu ug Laguindingan International Airport sa Misamis Oriental.
Una nang gikataho nga ang AIC gitakda nga magpatuman sa P4.53 billion investment plan nga maglakip sa pagpalapad pa sa passenger terminal building sa tugpahanan, pagpahimutang sa nga moderno nga aviation systems, ug pagpanindot sa airside ug landside facilities.
