CEBU CITY — Gihangyo sa pamilya ni kanhi-mayor sa Medellin, Cebu nga si Ricky Ramirez, kinsang gipatay sulod sa tambalanan, ang otoridad nga maghinay-hinay una sa pagbutyag og mga pamasangil batok kanila.
Matud sa tigpamaba sa pamilya nga si Giles Villamor nga natingala ang kinamanghuran nga si PJ Ramirez sa pamahayag sa Medellin Police chief nga adunay siya’y suspek sa pagpatay sa iyang amahan.
“Pedro Jesus or PJ, the youngest son of the murdered former Medellin mayor, denied reports that he already has a suspect in the brutal killing of his father,” matud sa pamilya sa ex-mayor.
Base sa giisyu nila nga statement, hugot nga gihimakak sa pamilya ang pasangil sa kapulisan ngadto ni PJ. Dugang pa ni Villamor, kinsa nga municipal planning officer sa Medellin, nga wala pa mitingog ang pamilya sukad sa duguon nga panghitabo sa ex-mayor niadtong Hunyo 18 sa gabii./
Sa pagkakaron, mihangyo ang pamilyang Ramirez sa publiko nga irespetar ang ilang privacy subay na sa ilang kasubo.
Kahinumduman nga gipatay sa mga armadong lalaki ang kanhi mayor ug incumbent councilor nga si Ricky sulod sa iyang hospital room sa Bogo-Medellin Medical Center ug padayon kining giimbestigaran sa otoridad.
