CEBU CITY-Gihaya na karon sa ilang panimalay ang patayng lawas ni Neca Denise Lagria sa Sitio Silot Barangay Yati lungsod sa Liloan sugod kagahapong adlawa sa Biyernes, Nobyembre 22, 2024.
Sa eksklusibong pakighinabi sa Bombo Newsteam kang Joevian Lagria-Lepiten, usa sa mga igsoon sa biktima diin gitataw niini nga dakong kasubo gihapon nila ang gibati sa tibuok banay nila apan arang-arang nalang kini kay nahatagan nila og haom nga seremonyas sa pagtaliwan ang ilang kamanghurang igsoon.
Kahinumdoman nga napalgan ang patay nga lawas ni Lagria sa South Road Properties (SRP) ning dakbayan sa Sugbo, kaniadtong Nobyembre 19 human kini gipangtasmastasan sa usa ka drayber og pampasaheroang jeep og gituok human nanlaban dayon gilabay sa baybayon.
Human napaubos sa otopsiya ang patayng lawas niini , gidala na kini sa ilang panimalay sa lungsod sa Liloan aron sa haya niini.
Samtang ang suspek sa pagkutlo sa kinabuhi ni Lagria balhog na karon sa prisohan human kini nadakpan sa lungsod sa San Remegio sa hiniusang operasyon sa mga sakop sa kapulisan.
