Dili tugutan ni Presidente Ferdinand Marcos Jr. nga ang mga langyaw mang-bully ug manghasi sa mga Pilipino sa kaugalingong nasud.
Kini human naabot kang Marcos ang mga insidente diin gibully ug gipanghasi sa Russian-American vlogger nga si Vitaly Zdorovetskiy ang pipila sa mga Pilipino.
Tungod niini, gipalihok dayon sa Presidente ang mga awtoridad diin adunay joint operation ang PNP, CIDG ug Bureau of Immigration aron masikop si Vitaly Zdorovetskiy.
Makita sa social media post sa Russian-American vlogger kung giunsa niya pag-insulto ang mga Pilipino ug wala girespeto ang balaod.
Gipaniguro sa Presidente nga ang katungod sa mga Pilipino kay mapanalipdan gikan sa mga langyaw nga wala motahod sa balaod.
Matod ni Palace Press Officer Usec Claire Castro, mag-atubang og kasong kriminal ang langyaw nga vlogger ug kauban niyang Filipino cameraman.
Gipahimangnoan usab sa Palasyo ang mga langyaw nga turista sa nasud nga sundon ug tahuron ang mga balaod.
Nanawagan usab si Castro sa mga content creator nga mahimong responsable sa ilang content tungod kay aduna silay responsibilidad sa paghatag og saktong impormasyon ug dili pagguba sa gobyerno nga walay basehanan.
Gipahibalo usab ni Usec Castro nga ang Russian-American vlogger i-deport ug mahimong madeklarar nga persona non grata.
