Gipahinumdoman ni Pres. Ferdinand Marcos Jr. ang tanang opisyal sa gobyerno sa pagpadayon sa paghatag og hinabang sa mga biktima sa Severe Tropical Store Kristine.
Matud sa Presidente nga ang mga kalisdanan nga nasinati sa mga biktima sa kalamidad angay nga tagdon ug dili maghunahuna nga mohunong tungod sa hagit nga ilang giatubang.
Gihatagan og gibug-aton sa Presidente ang mga opisyal sa gobyerno nga dili moundang sa pagtabang, kanunay nga hunahunaon ang kahimtang sa mga katagilungsod nga nag-antos tungod sa katalagman.
Gidugang niini nga isip mga opisyal, ang mga katagilungsod nga nalubog sa tubig baha, walay suplay sa tubig, walay pagkaon ug walay kaadtoan hinungdan nga dili angay ipakita sa gobyerno ang kakapoy.
Gimanduan sa Presidente ang mga miyembro sa Gabinete ug mga opisyal sa gobyerno gikan sa mga hingtungdan nga ahensya sa kanunay nga pag-update kaniya sa epekto sa Bagyong Kristine.
Mipasalig usab kini sa mga biktima sa bagyo ug LGUs nga ang gobyerno nagtrabaho 24 oras matag adlaw aron mahatagan ang gikinahanglan nga tabang sa mga lugar nga grabeng naapektuhan sa Bagyong Kristine.
Mitaho usab si Department of Social Welfare and Development (DSWD) Secretary Rex Gatchalian kang Marcos nga nakaapod-apod na og 150,752 ka family food packs alang sa mga biktima sa bagyo uban sa 3,231 non-food items, nga adunay kinatibuk-ang kantidad nga P111,133,601.54.
