Gidepensahan sa Presidential Communications Office (PCO) ang mga pagsaway sa bag-o lang nga adlawng natawhan ni Presidente Ferdinand Marcos Jr.
Giimbitar ang English pop rock band nga Duran-Duran sa usa ka mahalon nga hotel sa Pasay City alang sa ika-67 nga adlawng natawhan sa Presidente niadtong Biyernes.
Matud ni PCO Secretary Cesar Chavez, wala’y nagasto ang gobyerno sa nasambit nga pasundayag.
Ug ang maong pahalipay kay gibayran sa mga suod nga higala sa Presidente.
Ang maong performance sa Duran-Duran giingong usa ka surpresa nga nakapakurat usab sa presidente.
Gitataw ni Chavez nga sa adlaw nga natawhan sa Presidente, busy siya sa pagtabang sa mga kabus ug masakiton, ingon man pagtabang sa mga mag-uuma.
Gani, matod niya iya pa nga giablihan ang Palasyo sa Malacanan alang sa tanan diin adunay libreng pagkaon.
Kahinumduman nga nakadawat og negatibong reaksyon ang nahisgutang private birthday diin giingong kapin sa $700,000 o katumbas sa kapin P35-million ang gibayad sa maong English pop rock band alang sa private event samtang ang venue adunay kapin sa P38- milyon nga gigasto.
