Mibotar ang Pilipinas pabor sa worldwide moratorium sa paggamit sa death penalty isip legal nga silot sa United Nations General Assembly.
Kauban ang PH sa 129 ka ubang nasod nga mibotar sa resolution niadtong Disyembre 17 nga nagrepresentar sa kaylap nga pagsupak sa maong mga silot.
Ang resolusyon nakakuha og two-thirds majority nga pabor, 32 ka nasod ang misupak ug 22 ang ni-abstain.
Gipangunahan sa Argentina ug Italy ang lakang pinaagi sa Inter-Regional Task Force nga adunay 70 ka co-sponsor.
Ang naasoy nga resolusyon gisang-at matag 2 ka tuig, nga adunay katuyoan sa pagdasig sa mga nasud nga hunongon ang mga pagpatay samtang nagtrabaho aron makompleto ang pagwagtang sa silot sa kamatayon.
Kahinumdoman nga dinhi sa Pilipinas, hingpit nang giwagtang ang death penalty niadtong 2006 ubos ni kanhi Presidente Gloria Macapagal Arroyo ug ang labing bug-at nga silot sa nasod gipaubos sa tibuok kinabuhi nga pagkabilanggo.
