Gitun-an karon sa Manila ug Washington ang posibilidad nga mahikay ang panagtagbo nila ni Presidente Ferdinand “Bongbong” Marcos Jr. ug PUnited States President Donald Trump, sumala sa Department of Foreign Affairs (DFA).
Kini nga hisgutanan nitumaw atol sa tawag sa telepono tali ni DFA Secretary Enrique Manalo ug US Secretary of State Marco Rubio niadtong Miyerkules.
Matud sa DFA nga si Secretary Manalo ug Rubio kay nagkauyon nga susihon ang unang higayon nga panagtagbo tali ni Presidente Marcos ug Trump sa umaabot nga panahon.
Sa wala pa niini, gipamatud-an usab ni Marcos ang lig-on ug malungtaron nga alyansa sa PH-US ug gilauman usab niya nga makatrabaho si Trump sa iyang gobyerno.
Gihisgutan usab ni Manalo ug Rubio ang estado sa depensa ug seguridad nga kooperasyon tali sa duha ka kaalyado, lakip ang suporta sa US alang sa modernisasyon sa depensa sa Pilipinas ug ang sitwasyon sa South China Sea./
“Ang duha ka mga Sekretaryo usab nakamatikod sa papel sa trilateral nga kooperasyon uban sa Japan dili lamang sa pagpalig-on sa rehiyonal nga seguridad apan sa mga paningkamot usab sa pagtukod sa lig-on nga mga kadena sa suplay sa importante nga mga sektor ug sa pagdugang sa pribado nga mga pamuhunan.
