MANDAUE CITY,CEBU- Daling gidala sa tambalanan ang pipila ka mga tinun-an sa Mandaue City Comprehensive National High School human makasinati og kabalaka ug panic attack atol sa kusog nga linog nga nabati sa Sugbo Biyernes sa buntag.
Sumala sa Mandaue City Disaster Risk Reduction and Management Office (CDRRMO), base sa inisyal nga impormasyon, nahadlok ug nakuratan ang ubang mga estudyante samtang nagsige pa ang klase, hinungdan nga gilayon silang gi-evacuate gikan sa ilang mga classrooms.
Ang mga estudyanteng apektado, giluwas dayon ug gihatagan og paspas nga medikal nga atensyon sa school clinic, samtang ang uban gihatod sa duol nga tambalanan aron matambalan.
Nihatag usab og first aid ang mga responder sa lugar ug giasikaso ang kaluwasan sa tanang tinun-an.
Tungod niini, temporaryong gisuspinde ang klase aron masiguro ang kaluwasan ug kaayohan sa mga estudyante ug mga kawani sa eskuylahan.
Padayon karon ang assessment sa mga eskwelahan sa Mandaue ug tibuok Sugbo aron masiguro nga luwas ang mga estruktura ug mga estudyante.
Giawhag usab sa mga otoridad ang publiko nga magpabiling kalmado apan andam sa posible pang mga aftershocks.
