Nagpagawas og pamahayag ang pipila ka mga magtutudlo sa Cebu Institute of Technology – University (CIT-U) kabahin na sa nahimong desisyon sa unibersidad ang pagpahigayon og face-face classes ug examination taliwala sa bag-o lang nga linog ug nagpadayong afteshocks sa Sugbo.
Adunay pipila nga nipadangat sa Bombo Radyo Cebu team aron sa paghatag og balanse sa mga opinyon ingun man mga social media post nga nagsubay gihapon sa maong hisgutanan.
Subay niini, sa usa ka facebook post nga na-mentioned ang Bombo Radyo Cebu, gikabutyag didto ang iyahang personal nga opinyon nga nag-ingun, ang panginahanglan alang sa pagpadayon sa akademya ug lohikal nga paglihok, nga imbes nga magpabilin sa sistema nga pagsuspenso sa klase, alang kaniya nagdala kini og kawad-an sa pagkat-on ug ingun man mga oportunidad.
Dugang pa, sayup ang mga hungihong nga kwarta ang apas sa maong unibersidad, tungod kay matod pa, by law “no permit, no exam” policy, samtang kung padayon ang online classes, mas konsiderar pa nga nakatipid ang maong tunghaan sa matang sa “less energy, less maintenance, less operational costs.”
Kusganong gilimod usab kabahin sa kahadlok sa kaluwasan sa maong unibersidad kay matod pa, personal niini nga nakita ang pagpangandam ug maayo nga pagdumala, diin ang mga istruktura anaa sa maayong kondisyon.
Dugang pa, gitataw usab niini nga og nganung dili ipahigayon ang online examination tungod kay matod pa, ubay-ubay na ang cheating incidence kinsa ma konsiderar nga dili patas ngadto na sa mga naningkamot,
Sa katapusan, nanawagan lamang ang maong “personal opinionated” post sa pagrespeto ug pagsalig sa katawhan ngadto sa unibersidad ug sa nagpadayon niini nga normalidad, ilabi na nga ang CIT-U, nailhan isip “engineering school” nga nag-produce og labing maayong mga inhenyero sa nasud.
Sa pikas bahin, adunay lain usab ang nipahayag usab sa iyahang habig kabahin niini nga hisgutanan.
Diin, iyahang gikabutyag nga ang opisyal nga pamahayag gikan sa CIT-U kabahin na sa face-to-face classes, dili hinanali ug gihimo nga nagsubay pinaagi sa “extraordinary diligence” sa mga school administrator ug nagpabiling gikonsiderar ang risgo sa posibleng mga linog ug uban pang katalagman, ug gipunting nga ang pagpangandam sa susamang katalagman kabahin na sa responsibilidad sa maong tunghaan.
Dugang pa, ang Office of the Building Office (OBO) nihatag na usab og “Go signal” isip pasalig sa kaluwasan, kini human sa usa ka hingpit nga pagsusi sa matag building.
Gawas niana, lakip sa gipaambit mao ang CIT-U ang matang sa unibersidad nga nag-produce og “best engineers in this country,” nagsiguro sa dakong pasalig sa kalig-on sa ilahang istruktura.
Sa katapusan, gidasig niini ang mga estudyante nga mosalig sa nahimong desisyon sa “academic and administrative coucils,”, samtang nagpadayon ang paghatag og konsiderasyon sa mga “special exam arrangement” ngadto na sa mga nakasinati og mga mental health issues.
Giklaro usab niini nga walay pinugsanay ang pagpartisipar sa maong lakang, ug gi-awhag ang tanan sa pag-ampo alang sa kaluwasan sa kinatibuk-an.
