Gipaambit ni Angel Arcega, Bombo International Correspondent sa Bahrain nga tungod sa kabalaka nga mapiit sa nagpadayon nga gubat tali sa US-ISrael ug Iran kay wala dayon sila nagduhaduha nga mobakwit sa mas luwas nga lugar hilabi na nga anaa lang sa luyo sa usa ka base ang ilang gipuy-an nga naigo na sa miaging adlaw.
Atol sa pakighinabi sa Bombo Radyo Cebu kang Arcega nga bisan paman nga nihupay na ang sunod-sunod nga pagbuto sa ilang lugar kay dili gihapon nila malikayan nga makuyawan ug mabalaka alang sa ilang kaluwasan.
Napaambit usab niini nga wala’y bomb shelter ang nasud busa sa matag higayon nga motingog ang ilang mga cellphone aron i-alerto sila ug mahimangnoan nga dili mogawas sa ilang mga kabalayan kay doble ang ilang mabati nga kahadlok.
Subay niini, midapit si Arcega sa mga Pilipino ug sa tibuok kalibutan nga modalit og pag-ampo alang sa ilang kaluwasan ug nanghinaot kini nga mahunong na ang gubat nga mikalas na og pipila ka kinabuhi.
