Tumang kaguol ang nabati karon ni Antonia Daclan, usa sa mga residente nga nasunogan sa Sitio Univille, Brgy. Kasambagan, Cebu City, kini human iyang giasoy nga wala silay nasalbar maskin bugas sa dihang niulbo na ang sunog sa naasoyng dapit gahapong adlawa, Marso 7.
Matod ni Daclan, sa usa ka eksklusibong pakighinabi sa Bombo Radyo Cebu newsteam kaniya, naghilak siya gumikan kay wala silay bugas, gamit, o bisan unsang matang sa butang nga nasalbar tungod sa sunog.
Gani, gawas sa mga gamit ug balay nga naugdaw, nalakip pa ang kwartang gihiposan niya para igpapalit unta og gatas sa bata, apan naapil man kini og lamoy sa dakong kalayo sa maong sunog.
Giasoy ni Daclan nga sa dihang gasukad na unta siya og kaon para paniadto, kalit lang niyang namatyagan nga adunay nikalit og buto sa palibot.
Apan sa maong pagbuto, aduna kini dalang kalayo dayun hapak sa hangin, hinungdan nga daling mikatap ang kalayo pa ingun sa ilahang balay.
Sa pagkakaron, nanawagan nalang si Daclan nga kung kinsa ang buot motunol kaniya kon sa iyang pamilya og materyales pangbalay, andam ug abli ang iyahan mga kamot nga modawat niini aron makatukod sila og balik og balayng kapuy-an.
Basi sa inisyal nga taho, gilauman nga moabot sa 52 ka mga panimalay ang naugdaw human niulbo ang maong dakong sunog nga daling nikatap hinungdan nga miabot kini sa Fourth Alarm.
Base sa report gikan sa Cebu City Fire Station (BFP-7), nadawat nila ang alarma sa alas 2:04 sa hapon, ug tungod sa kakusog sa kayo, gipasaka dayon ang alarma ngadto sa First Alarm sa alas 2:10 sa hapon, hangtod nga niabot kini sa Fourth Alarm sa alas 2:58 sa hapon.
Ang maong sunog niigo sa residential area nga gipanag-iya ni Romeo Sayson ug gi-okupar ni Rodney Sayson, diin gibanabana nga moabot sa 70 ka pamilya o 280 ka indibidwal ang nawad-an og kapuy-an human naugdaw ang 2,600 square meters nga dapit.
Sa gihimong operasyon, adunay duha (2) ka tawo ang naangol, samtang swerte nga wala’y nakalas nga kinabuhi.
Niabot usab sa 12 ka BFP fire trucks, duha ka ambulansya, ug 10 ka auxiliary units ang nagtinabangay aron mapawng ang kalayo, ug gideklarar nga “under control” ang sunog sa alas 3:23 sa hapon ug hingpit nga napawng o “fire out” sa alas 4:31 sa hapon.
