LAPU-LAPU CITY-Mokabat sa tulo ka mga polis gikan sa Lapu-Lapu City Police Office (LCPO) ang gihatagan og temporaryo nga assignment tungod kay aduna silay mga kabanay nga modagan sa Barangay ug Sangguniang Kabataan (SK) Elections nga gikatakda sunod buwan.
Kini ang gitino ni Police Lieutenant Colonel Christian Torres, ang tigpamaba sa LCPO, nga ang tulo tugotan nga makabalik sa ilang nadestino nga mga unit human sa piniliay.
Dugang pa, nga usa ka police personnel, nga kanhi nadestino sa traffic enforcement unit sa LCPO, gibalhin sa Police Station 1 sa Olango Island.
Samtang ang laing duha nga nadestino kaniadto sa Police Station 1, gibalhin sa Station 4 sa Barangay Marigondon sa mainland Lapu-Lapu.
Apan hangtod karon wala pa silay nadawat nga direktiba gikan sa ilang hepe sa kapolisan nga si PCol Elmer Lim alang sa reshuffling sa mga personnel.
Sa laing bahin, ang LCPO, uban sa koordinasyon sa Commission on Elections (Comelec), mopahigayon usab og peace covenant signing karong Sabado, Septiyembre 23, aron maseguro ang pagpahigayon sa malinawon ug hapsay nga BSKE karong Oktubre 30.
