Nimando sa paghatag og go bags sa tanang police personnel sa tibuok nasud si Acting Philippine National Police (PNP) chief Lt. Gen. Jose Melencio Nartatez Jr. niadtong Huwebes, Oktubre 16 isip kabahin sa ilang paningkamot nga mapalambo ang emergency response capabilities sa serbisyo sa panahon sa katalagman.
Siya niingon nga tukma kaayo kini sa panahon, kon konsiderahon nga ang nasud naigo sa sunodsunod nga mga bagyo, linog ug pagbuto sa bulkan sa bag-ohay lang.
Sa sayo pa, gisugdan na sa PNP Public Information Office ang pag-apod-apod sa mga emergency go bags ngadto sa ilang mga personnel, nga ang matag usa adunay sulod nga essential survival items sama sa first aid kit, ready-to-eat food, tubig, flashlight, whistle ug communication tools.
Gipasiugda ni Nartatez nga ang pag-apod-apod sa mga go bags kabahin sa mas lapad nga disaster preparedness and resilience program sa PNP nga gitumong sa pagpalig-on sa kaandam sa operasyon sa organisasyon panahon sa kalamidad.
Sa pagkakaron, ang acting PNP chief miingon nga ang implementasyon sa “Go Bag for Every Pulis” program ipahigayon sa mga hugna, nga mag-maximize sa available nga logistics ug resources sulod sa PNP.
