CEBU CITY – Malaumon si Police Regional Office 7 Director Police Brigadier General Debold Sinas nga mukooperar na kanila ang inahan ni Christine Lee Silawan, ang grade 9 student nga brutal nga gipatay sa dakbayan sa Lapulapu niadtong Marso 10.
Kini human nga nagpositibo gayud ang lama sa dugo sa gunting nga gigamit sa self confessed killer ni Silawan nga si Renato Llenes ngadto na sa DNA ni Christine Lee.
Matud ni Sinas nga dakong tabang kini sa ilang kaso nga gipasaka batok kang Llenes sanglit makapalig-on matud pa kini sa ilang kaso. Samtang padayon pa usab ang DNA examination sa lama sa dugo sa iyahang sinina, sapatos ug karsones nga natalsikan sa dugo sa biktima ug matud pa nga giuna lamang ang hinagiban nga gigamit sa suspek.
Dugang pa ni Sinas nga ang resulta sa DNA ang nag match gayud sa sulti sa suspek sa dihang giangkon niini ang pagpatay kang Christine Lee. Nasayran nga didto pa sa kauluhan gipubos sa DNA examination ang mga nakuhang ebedensya sa kapulisan.
Gipaubos usab sa psychological examination si Llenes ug nasuta nga wala kini problema sa pangutok ug nakahibaw gayud kini sa iyahang gibuhat sa biktima.
