Masaligon ang Philippine National Police (PNP) nga mga hired gunman ang nag-ambush kang Shariff Aguak Mayor Datu Akmad Ampatuan Sr. niadtong miaging semana, basi sa pasiunang resulta sa imbestigasyon.
Sumala sa tigpamaba sa PNP nga si Police Brigadier General Randulf Tuaño, ang inisyal nga ebidensya nagsugyot nga ang mga suspek adunay kalambigitan ug posibleng gikontrata aron ipatuman ang pag-atake.
Usa sa mga nag-unang suspek, nailhan sa alyas nga “Raprap,” adunay rekord sa kriminal ug nalambigit sa daghang seryosong mga krimen.
Sa usa ka follow-up operation, napatay sa pulis ang tulo sa upat ka suspek, lakip ang giingong lider sa grupo, human sa engkwentro.
Nagporma ang PNP og Special Investigation Task Group aron mag-focus sa kaso, nga giingon sa mga awtoridad nga ika-upat nga pagsulay sa pagpatay sa mayor.
Gisulayan pa sa mga imbestigador nga mahibal-an ang motibo sa pag-ambush ug kinsa ang nagsugo sa pag-atake.
