CEBU – Nipagawas og pahinumdom sa publiko ang Philippine Overseas Employment Administration (POEA) bahin sa mga tanyag nga trabaho sa gawas sa nasud nga makita sa social media karon nga hinay-hinay na nga gipagaan ang COVID-19 restrictions sa ubang kanasuran.
Giingong usa sa mga trabaho nga gitanyag karon sa social media mao ang 450 ka mga magtutudlo sa Filipino nga gikinahanglan sa Taiwan.
Tungod sa giingong P115,000 nga suweldo matag buwan nga madawat sa mopasar nga aplikante, daghan ang nagkainteres nga mo-apply.
Lakip sa nadani sa tanyag mao ang magtutudlo sa senior high school nga si Rea (dili tinuod nga pangan) sa Lapu-lapu, Cebu.
Pito na ka tuig nga nagtudlo si Rea sa publikong tunghaan mao nga nakahuna-huna kini nga manarbaho sa gawas sa nasud aron makakuwarta ug makasuporta sa iyang pamilya.
Sa pagbisita sa niini sa buhatan sa POEA-Region 7, nasuta nga walay pangalan sa recruiter ug amo nga gihisgotan sa social media post bahin sa job hiring sa mga Pinoy teacher.
Sumala sa taho, pangan lang sa Ministry of Education sa Taiwan ang nakalista.
Sa listahan sa POEA sa mga rehistradong recruiter, giingong usa lang ka kompanya ang mitungha ug usa ra ka magtutudlo ang gikinahanglan.
Hinungdan nga ilang gipahinumdoman nga magmatngon ug susihon kon lehitimo ba ang gitanyag nga trabaho sa gawas sa nasud nga makita sa social media.
