CENTRAL VISAYAS-Nagpaabot pa ang Police Regional Office 7 sa kamandoan gikan sa Commission on Election sa Central Visayas kung pila ka personnel ang gikinahanglan nga ipakatap sa Negros Oriental nga gi deklarar nga ubos sa Comelec Control atol sa umaabot nga Barangay ug Sanguniang Kabataan Election human sa mga insidente nga nahitabo sa maong probinsya sa nanglabay nga katuigan.
Matod ni Police Lieutenant Colonel Gerard Ace Pelare spokesperson ni Police Brigadier General Anthony Aberin hepe sa PRO-7 nga andam sila nga motuman kung unsa man ang desisyon sa Comelec ilabi na sa deployment sa Negros Oriental.
Samtang, wala usab gisalikway ni Pelare nga kung gusto sa maong ahensya nga hulipan ang tanang personnel sa maong lalawigan gikan sa kapulisan sa Sugbo wala silay mahimo, apan una na nga mibutyag si Attorney Lionel Marco Castillano nga misalig siya sa kasamtangan nga hepe sa Negros Oriental Police Provincial Office.
Dugang pa, nga patutokan sa PRO-7 ang Negros ilabi na ang pagpadalag daghang personnel gikan sa lain-laing provincial ug city police office aron masiguro nga luwas ug hapsay ang umaabot nga Barangay ug Sanguniang Kabataan Election BSKE 2023.
Gipaniguro ni Pelare nga dili angay nga mabalaka ang publiko nga maapektohan ang pagpatuman sa peace and order sa usa ka dapit kung kuhaan kinig mga police sanglit lahi ang sitwasyon sa matag lugar.
