CEBU CITY-Gipahimangnuan ni Cebu City Acting Mayor Raymond Alvin Garcia ang mga manindahay sa mga pampublikong mercado sa dakbayan nga dili tikasan o panghimuslan ang mga bisita sa dakbayan nga mamalit sa mga produkto atol sa Palarong Pambansa.
Kini ang pamahayag ni Acting Mayor human nakadawat og pipila ka mga reklamo nga giingong mas taas kontra sa normal nga presyo ang mga palaliton ilabi na sa mga utanon sa usa ka pampublikong mercado sa dakbayan.
Nimando na si Garcia kang City Administrator Atty. Kristine Batucan sa paghimo og pakisusi pinaagi sa Price Monitoring Council aron bantayan ang lihok sa presyo sa mga palaliton sa mercado sa dakbayan.
Dugang pa, nga ang masakpan nga nilapas sa balaud kay makasugat kini og silot sama sa multa o di ba kaha pagkanselar sa ilang permit.
Kahinumduman nga ang mga produktong utanon nga gibaligya sa dakbayan kay mas taas og presyo kontra sa mga milabay nga panahon o kun itandi ss presyo sa laing bahin sa nasud tungod kini sa inflation ug ang delubyo nga nadala sa El Niño niadtong milabay nga harvest season.
