CENTRAL VISAYAS-Nasubo ang Police Regional Office sa Central Visayas (PRO 7) sa kalit nga pagkamatay sa ilang 25-anyos nga kauban human ma-aksidente sa motorsiklo sa Larena Street, Barangay Poblacion, Guihulngan City, Negros Oriental, niadtong Domingo, Hulyo 21, 2024.
Giila ang naasoy nga pulis nga si Lieutenant John Dale Decoma Mayo, kinsa nadestino sa 2nd Provincial Mobile Force Company 3rd Maneuvering Platoon sa Barangay Buenavista, Guihulngan dakbayan, Negros Oriental.
Ang biktima padulong sa kampo sa PMFC human nipahigayon og surveillance operation pasado tungang gabii niadtong Lunes, Hulyo 22, 2024, dihang nawad-an kini og kontrol sa motorsiklo samtang nag-agi sa kurbada, ni-overshot sa iyang lane sa Larena Street sa Guihulngan City ug nahagbong sa konkretong paril.
Matod ni Police Lieutenant Colonel Gerard Ace Pelare, tigpamaba ni PRO 7 Director Brigadier General Anthony Aberin, nga ila nang gimanduan ang kadagkoan sa Negros Oriental Police Provincial Office nga makig-alayon sa pamilya sa biktima nga nagbase sa Luzon aron dad-on ang patayng lawas niini.
Matud pa ni Pelare nga giproseso na usab ang mga papeles alang sa financial assistance nga ihatag sa pamilya sa biktima.
Si Mayo kabahin sa Philippine National Police Academy (PNP) “Alab-Kalis” Class of 2022.
