Nanawagan ang House Quad Comm kang kanhi presidential spokesperson Harry Roque nga mo-surrender human gibasura sa Korte Suprema (SC) ang iyang apela kalabot sa detention order nga giluwatan sa komite.
Gihimo ni Sta Rosa City Rep. Dan Fernandez ug Surigao del Norte Rep. Robert Ace Barbers ang panawagan nunot sa pagsalikway sa SC sa hangyo ni Roque.
Si Roque nalambigit sa ilegal nga operasyon sa mga Philippine offshore gaming operators (POGOs) nga gikonsiderar nga person of interest.
Nag-file siya og petition for a writ of amparo, usa ka protective writ nga iyang gisang-at aron makalingkawas sa detensyon samtang ang Quad Comm nag-imbestigar sa iyang kalambigitan sa ilegal nga kalihokan sa POGOs.
Matod ni Fernandez, dili pa kini ang panahon sa paglusot ug angay niyang atubangon ug tubagon ang mga pasangil batok kaniya.
Giawhag ni Barbers si Roque nga maminaw sa lagda sa balaod ug mokooperar sa nagpadayong imbestigasyon nga nagbutyag sa makahasol nga koneksyon sa POGOs sa ubang ginadili nga kalihokan, lakip na ang mga sindikato sa ilegal nga drugas ug extrajudicial killings.
Sa desisyon sa SC, nga gipakanaog niadtong Oktubre 1, giklaro nga ang writ of amparo alang sa mga kaso sa extrajudicial killings o enforced disappearances, mga sitwasyon nga wala magamit sa kaso ni Roque.
Hinungdan nga giawhag ni Barbers si Roque nga respetuhon ang legal nga proseso.
