CENTRAL VISAYAS-Padayon ang gipahigayon nga kamandoan gikan sa kadagkoan sa PNP Police Regional Office – Central Visayas (PRO-7) sa tanang unit sa kapulisan sa Central Visayas sa ilang gilusad nga regionwide manhunt operation batok sa suspek sa pagpatay ni Mae Fatima Tagactac sa dakbayan sa Toledo.
Kini human napalgang patay si Mae, usa ka 18-anyos ug tinun-an sa Grade 12 sa Buanoy National High School nga lumulupyo sa Barangay Mainggit sa dakbayan sa Toledo sa usa ka lawak sa lodging house sa maong dapit.
Matod ni Police Lieutenant Colonel Gerard Ace Pelare, ang tigpamaba sa kapulisan sa Central Visayas nga ilang gikondinar ang linuog nga pag patay sa dalagitang biktima.
Gitinguha sa kapulisan nga madakpan sa labing dali nga panahon ang suspetsado nga giila nga si Lorben Cabugsan Larot nga nagpaila sa iyang alyas nga “Richard Cabugsan”.
Hugot nang gibantayan sa mga awtoridad ang tanang entry and exit points sa probinsya sa Sugbo aron sa padayong pagsuta sa suspek.
