CEBU PROVINCE– Nasakmit ang mokabat sa P3 milyones nga kantidad sa gituohang shabu atol sa usa ka semana nga Simultaneous Anti-Criminality Law Enforcement Operation (SACLEO) sa lalawigan sa Sugbo.
Gikabutyag ni Police Major Windell Abellana, Public Information Officer sa Cebu Provincial Police Office (CPPO), nga 47 ka anti-illegal drug operations ang gipahigayon gikan Enero 22 hangtod Enero 28, 2024, sa tibuok probinsiya.
Sulod ning panahona, nasakmit ang 441.26 gramos sa gituohang shabu nga adunay Standard Drug Price (SDP) nga P3,000,568.
Nasikop usab ang 63 ka mga indibidwal sa kampanya batok sa ilegal nga drugas.
Matod usab ni Abellana nga napasakaan na nila og kasong kriminal ang 106 ka mga giingong drug personalities.
Gawas sa mga operasyon batok sa ilegal nga drugas, 9 ka indibidwal usab ang nasikop sa 29 ka mga operasyon batok sa paghupot og loose firearms.
Miresulta kini sa pagkakumpiska sa 12 ka walay lisensya nga armas. Dugang pa, adunay kinatibuk-an nga 19 ka mga armas ang gi-turnover sa mga indibidwal ngadto sa mga pulis.
