Gihimakak sa Department of Justice nga si kanhi House of Representatives Speaker Martin Romualdez nalakip sa opisyal nga listahan sa mga girekomendar nga pasakaan og kaso sa National Bureau of Investigation.
Bisan pa sa giingong kalambigitan niya sa mga anomalosong flood control projects, gikompirmar sa departamento nga wala maapil ang magbabalaod.
Gahapon, opisyal nga gipagawas sa Department of Justice ang mga pangalan nga girekomendar alang sa akusasyon sa bureau.
Busa, ang kasamtangang Kalihim sa Department of Justice, Sec. Jesus Crispin ‘Boying’ Remulla, nipasabot nganong wala siya maapil ug iyang gitumbok nga ang kapakyas sa pagtunga sa saksi nga si Orly Regala Guteza sa ilang gikatakdang tigom maoy hinungdan sa ‘exclusion’ sa kongresista.
Dugang niini nga kinahanglan pa nga pamatud-an ug susihon ang mga pasangil ug alegasyon nga naglambigit ni kanhi House Speaker Martin Romualdez.
Samtang, gikompirmar usab sa opisyal nga giandam na nila ang hangyo sa International Criminal Police Organization nga mag-isyu og Blue Notice ngadto kang Ako Bicol Party-list Rep. Zaldy Co.
Bisan og wala pa’y ‘blue notice’, gipasalig sa kalihim nga ila kining giproseso karon dungan sa iyang pagkalambigit sa mga anomalosong proyekto sa pagpugong sa baha.
