Nakalimpyo na sa 10 ka mga urban cemetery, samtang karong adlawa gi andam na ang pagpahamtang sa mga portable toilets, naka pasuga na usab sa mga internat portion sa mga menteryo.
Gitagaan karon og bili ang mga pamaagi sa kung unsaon pagpanghinlo sa mga matag sam-ang sa Sugbo, ilabi na nga nagkaduol na ang adlaw sa mga minatay.
Busa, gikuha sa Bombo Radyo Cebu team ang habig ni John Paul Gelasque gikan sa Department of Public Services aron esklusibong masusi sa kung unsa ang mga pamaagi ug lagda ingun man ang mga nabuhat na nunot sa nagsing-abot nga kalag-kalag.
Subay niini, gikabutyag ni Gelasque nga nakalimpyo na sa 10 ka mga urban cemetery, samtang karong adlawa usab, Oktobre 29, gi -andam na ang pagpahamtang sa mga portable toilets, naka pasuga na usab sa mga internal portion sa mga menteryo.
Dugang usab ni Galasque nga igka petsa 31 sa Oktobre hangtud petsa 2 sa Nobyembre ning tuiga, nag-assign na usab siya og mga street cleaners sa nagkadaiyang sam-ang, ingun man mga dump trucks nga magkuha og magkolekta sa mga basura matag gabii.
Gitataw usab ni Galasque nga sukad pa niadtong Oktobre 20, adunay gatosan ka mga street cleaners ug gi “by schedule” ang pagpang-deploy niini sa matag sam-ang aron na sa ilang tagsa-tagsang buluhaton, gumikan dako ang mga sam-ang nga ilang limpyohan.
Giklaro usab niya nga bisan sa petsa 1 ug 2 sa Nobyembre, aduna gihapoy nakastand-by nga mga street cleaners sa matag sam-ang aron mamintinar ang kalimpyo ug kahapasay sa matag sam-ang.
