Gikompirmar ni National Bureau of Investigation (NBI) Director Jaime Santiago ang pagkasikop sa usa ka vlogger sa Sugbo tungod sa pagpakatap sa fake news nga giingong giduso daw ni Presidente Ferdinand Marcos Jr.
Gipakita sa kadagkoan sa NBI ang orihinal nga post gikan sa News Channel nga “News5” ug usa ka altered nga post nga naglangkob sa kanhing pamahayag sa Presidente sa usa ka campaign rally.
Matod sa NBI-Central Visayas Regional Office, samtang nagpahigayon og cyber patrolling, nakakita sila og vlogger nga nag-post og giusab nga post nga dunay caption nga “drugs are legal, you’re so bad Marcos”.
Kalabot niini, matod sa hepe sa NBI nga si Santiago, milihok dayon ang NBI-Central Visayas Regional Office ug mihimo og operasyon ug nasikop ang vlogger nga si Wendolyn Apduhan Magalso.
Emosyonal nga gipasabot sa content creator nga iya lang kining gihimo aron makakuha og atensyon ug makakuwarta.
Naghilak siya nga nangayo og pasaylo kang Presidente Ferdinand Marcos Jr. apan nagkanayon ang kadagkoan sa NBI nga gisugdan na usab nila ang pag-imbestigar sa ubang vloggers.
Gibutyag usab sa opisyal nga seryuso nga naghimo og tukmang lakang ang ahensya aron masumpo ang pagkuyanap sa fake news.
Giawhag usab sa kadagkoan sa NBI ang publiko nga susihon una ang impormasyon sa social media ug gipahimangnoan nga ang pagpakatap og bakak nga impormasyon usa ka criminal case.
Ang suspek nag-atubang og kaso ubos sa Article 152 sa Revised Penal Code, in relation to the Cybercrime Prevention Act of 2012 nga posibling mag-atubang og silot nga pagkapreso sulod sa 6 ka buwan hangtod 6 ka tuig ug multa hangtod sa P200,000.
Ang pagdakop sa NBI sa vlogger nahitabo taliwala sa nagpadayon nga House Tri-Committee hearing sa fake news ug cybercrimes.
