SAN FERNANDO,CEBU- Padayon pa nga gipangita sa kapulisan sa lungsod sa San Fernando sa habagatang Sugbo ang suspek sa pagpamusil sa usa ka off duty security guard sa usa ka kompanya sa produktong petrolyo pasado alas 8 sa gabii, sa may Barangay. San Isidro, Lungsod sa San Fernando, Huwebes Enero 23, 2025.
Nahitabo kini sa Barangay San Isidro sa lungsod sa San Fernando diin ang biktima kay giilang si Arman Cañedo, 32 anyos, ug lumulupyo sa Barangay Valencia, dakbayan sa Carcar.
Sa pakighinabi sa Bombo Newsteam kang PMaj Michael Gingoyon, ang hepe sa San Fernando Police, nga base sa initial nga impomasyon nga ilahang nahipos gikataho nga padung mosakay sa iyang motorsiklo ang biktima aron mopauli na gikan sa iyang duty sa gitrabahoan nga petroleum products company sa dihang gipusil kini sa makadaghang higayon hinungdan sa iyang hinanaling kamatayon.
Daling miikyas ang mamumuno sa maong insidente diin hangtud karon padayon gihapon gipangita sa mga sakop sa kapulisan.
Narecover sa crime scene ang mga kabhang ug deformed slug nga gikan sa kalibreng 45 nga pusil nga maoy murder weapon.
Dugang pa ni Gingoyon, nga usa sa ilahang gipanglantawan nga lalis sa trabaho ang motibo sanglit ang maong biktima gikataho nga istrikto isip pagka sekyu ug ubay-ubay na nga mga kaubanan niini ang gikaingon nga gipaundang gumikan niya.
Dugang pa, gikaingon nga nakadawat ug mga hulga sa kinabuhi ang maong biktima sa wala pa mahitabo ang maong insidente.
Sa pagkakaron, padayon gihapon sa imbistigasyon ang San Fernando Police og gipangita na ang usa ka person of interest nga gikaingon nakalalis niini sa iyang gitrabahoan.
Kasamtangang gidala ang biktima sa punerarya sa dakbayan sa Sugbo diin padayon gihapon ang pag process sa SOCO sa autopsy sa patayng lawas ug gikatakda nga dad-on sa ilang panimalay.
Giawhag sa pamunuan sa San Fernando Police ang publiko sa adunay kasayuran sa maong panghitabo mga mutahan sa ilang istasyon aron masulbad ang kaso.
