BARILI, CEBU- Patay ang driver sa usa ka 14-wheeler trailer truck sa dihang nidasmag kini sa laing sakyanan og nabangga sa usa ka poste sa National Highway sa Barangay Población, lungsod sa Barili sa kasadpang bahin sa Sugbo, gahapon Biyernes Septiyembre 27, 2024.
Giila ang driver nga si Rowel Merasol, hingkod ang panuigon ug lumulupyo sa Barangay Ocaña sa dakbayan sa Carcar.
Gipanag-iya ang maong trailer truck sa GO 5 Transporter Services Incorporated.
Atol sa inisyal nga imbestigasyon sa mga kapulisan sa maong lungsod, ang trailer truck nagkarga og pipila ka mga dagkong kabilya isip construction materials nga padulong sa lungsod sa Dumanjug.
Dihang nagsubay na kini sa kadalanan sa maong dapit, gikataho nga aduna kiniy problema sa brake hinungdan sa pagkawala og control sa driver og diha na naaksidente.
Ang nabanggan sakyanan sa dapit wala hinuon naka-angkon og mga samad apan ang driver sa trailer truck maoy hilabihang nasamdan hinungdan sa kamatayon niini.
Padayon pa ang imbestigasyon sa mga kapulisan sa maong lungsod sa naasoy nga aksidente.
