Subling miapelar ang United Nations sa Israel nga ablihan ang mga utlanan sa Gaza aron tugutan ang kapin 3,000 ka mga truck sa lifesaving aid, nga tabang nga makasulod, taliwala sa nagkagrabe nga krisis nga gitawag sa usa ka UN official nga ‘grabe nga collective punishment.’
Sumala sa mga taho, liboan ka mga Palestinian ang misulod sa usa ka field office sa United Nations Relief and Works Agency (UNRWA) sa Gaza sa pagpangita og tambal. Bisan tuod walay naangol, daghang mga sakyanan ang nangadaot ug nasakmit ang mga suplay.
Sukad natapos ang ceasefire niadtong Marso 18, giputol sa Israel ang tanang hinabang ngadto sa Gaza ug gikanayon sa Israel nga bahin kini sa usa ka estratehiya aron mapugos ang Hamas nga buhian ang nahabilin nga mga hostage ug mosurender.
Apan sumala sa U.N. High Commissioner for Human Rights, ang kagutom sa mga sibilyan giisip nga usa ka krimen sa gubat.
Gihimug-atan sa Gaza Health Ministry, kapin sa 52,000 ka mga tawo ang napatay sa giyera sukad kaniadtong Oktubre 7, 2023, lakip ang kapin sa 2,200 sukad nga gipadayon sa Israel ang opensiba kaniadtong Marso.
Ug miingon ang United Nations Relief and Works Agency (UNRWA) nga 660,000 ka Palestinian ka mga bata ang wala na makatungha ug kapin sa 1 ka milyon nga mga bata ang nameligro sa grabeng malnutrisyon.
