Nanawagan si United States Vice President Kamala Harris alang sa negosasyon sa usa ka hostage deal ug ceasefire arun mapadali pagkahuman sa airstrike sa Israel nga nakapatay og kapin sa 100 ka mga tawo sa Gaza.
Gikondenar ni Harris ang pag-atake nga miresulta sa pagkamatay sa mga sibilyan sa usa ka eskwelahan sa Gaza nga iyang giingon nga ‘far too many.”
Gidugang pa ni Harris sa iyang rally sa Phoenix, Arizona nga bisan og ang Israel adunay katungod sa pagpanalipod sa ilang teritoryo, miingon kini nga ang Israel kinahanglan usab nga mahibalo sa importansya ug responsibilidad sa paglikay sa mga sibilyan nga kaswalti.
Sa pahayag sa tigpamaba sa Israeli military, ang al-Taba’een school nga ilang gibombahan giingong pugad sa Hamas ug Islamic Jihad military, nga hugot nga gipanghimakak sa Hamas.
Ang tigpamaba sa Israel Defense Forces (IDF) nga si Rear Adm Daniel Hagari nag-akusar sa Hamas nga ang gidaghanon sa mga kaswalti nga giingong gibuhian niini wala motakdo sa impormasyon nga gihuptan sa IDF ingon man sa impormasyon mahitungod sa mga eksplosibo nga gigamit sa pag-atake sa Israel.
Giingon usab nga dili moubos sa 19 ka mga terorista gikan sa Hamas ug Islamic Jihad ang namatay sa pag-atake.
Sumala sa Israel, ang Hamas naggamit sa mga sibilyan nga imprastraktura sa pagplano ug paghimo sa mga pag-atake, mao nga ilang gitarget ang mga ospital ug mga eskwelahan ug uban pang mga lugar nga gipanalipdan ubos sa internasyonal nga balaod.
Kusganon kining gipanghimakak sa Hamas.
