Nibisita si DepEd Secretary Sonny Angara isip pinasidunggang dinapit sa gipahigayon nga Teacher Promotion sa DepEd-7 didto sa Talisay National High School, diin 418 ka mga maestra ug maestro ang pormal nang na-promote human sa taas nga katuigan nga pagpaabot.
Atol sa maong kalihokan sa Department of Education-Central Visayas, gihimug-atan ni Secretary Angara nga usa sa mga prayoridad nga programa sa administrasyong Marcos mao ang paghatag og gana o motibasyon sa mga magtutudlo pinaagi sa pag-promote kanila.
Lakip nga gihisgutan usab niini ang pagtangtang sa mga dili importanteng trabaho o “paperwork” sa mga magtutudlo ug ang paghatag og administrative assistance aron makatutok sila sa pagpanudlo ngadto sa mga estudyante nga walay sagabal.
Giklaro ni Angara nga ang maong promotion “long overdue” na o dugay na kaayong angay unta nga nahatag, tungod kay adunay mga magtutudlo nga nagpaabot og kapin sa napulo ka tuig una pa gyud intawon nasaka ang ranggo sa trabaho.
Kini ang rason kon nganong gipaningkamotan sa maong buhatan, ilabi na ni Pres. Ferdinand Marcos Jr., nga mabati sa mga magtutudlo nga gihatagan og bili ang ilang propesyon.
Dugang pa niini, gihisgutan usab nga adunay mga magtutudlo ang mamalhin o manimpalad sa gawas sa nasod tungod sa kagamay sa sweldo, hinungdan nga gihimo kini sa departamento isip paagi sa paghatag kanila og pasidungog.
Nanghinaot usab si Angara nga pinaagi niini, mogamay na ang gidaghanon sa mga magtutudlo nga moundang sa ilang trabaho dinhi sa Pilipinas aron lang mo-abroad.
Samtang, emosyonal usab nga nibutyag ang 56-anyos nga maestra gikan sa Lawaan National High School nga si Daisy Dela Serna, human kini na-promote sa gipahigayon nga mass oath taking.
Wala’y kabutangan sa kalipay ni Dela Serna tungod kay gikan sa pagka-Teacher I sulod sa 20 ka tuig, nisaka na gyud kini sa Teacher III human napaubos sa Expanded Career Progression (ECP) nga programa sa Department of Education.
