LILOAN, CEBU-Sikop ang usa ka Tourist Vehicle Driver sa lungsod sa Liloan human sa nahitabong buy-bust operation sa mga sakop sa Philippine Drug Enforcement Agency-Central Visayas (PDEA-7) sa pakig-alayon niini sa kapulisan sa maong lungsod kagahapon, Lunes Agosto 19, 2024.
Nahitabo ang maong buy-bust operation sa Purok Cogon, Barangay San Vicente, lungsod sa Liloan pasado alas 2:40 sa hapon.
Giila ang dinakpan nga si Julius Anthony Redoble Ponce, 30-anyos ug lumulupyo sa Purok Tambis, Sitio Tabok-Lamac, Brgy. Yati, Liloan diin nakuhaan kini sa 6 ka nagkadaiyang pakete nga miabot sa 5.2 gramos sa gituohang shabu nga adunay balor nga P35,360.
Gawas sa mga pakete sa gituohang shabu, nakuha sab sa mga awtoridad ang ang marked money ug kaha sa sigarilyo diin niya gisimpit ang drugas.
Kasamtangang nabalhog karon sa Liloan Municipal Police Station ang dinakpan og mag-atubang kini ug kaso sa kalapasan sa Comprehensive Dangerous Drugs Act of 2002.
