CEBU – Kasamtangang nahunong karong adlawa ang pagbakuna sa dakbayan sa Sugbo gumikan kay nahurot na ang suplay sa Pfizer COVID-19 vaccine nga gihatag alang sa dakbayan.
Hinuon matud ni Cebu City Health Officer Dr. Jeffrey Ibones nga adunay ipadala nga 5,000 doses sa Sinovac nga bakuna ang Department of Health (DoH-7) diin posibleng maka resume ang pagpabakuna ugmang adlawa.
Positibo ang dagan sa vaccination roll out sa syudad sanglit daghan na matud pa ang ‘willing’ nga magpabakuna gani mo-average sa 4,000 ka mga indibidwal ang mabakunahan matag adlaw.
Wala usa’y problema sa nasinating adverse events sanglit mga mild lang ang nasinati sa pipila.
Samtang gipasabot ni Ibones nga magdepende sa suplay sa bakuna nga ihatag sa syudad sanglit kung suplay nga gikan sa COVAX facility kinahanglan nga masunod gyud ang guidelines sa World Health Organization (WHO) sa mahatagan sa maong bakuna nga mao ang A1, A2, A3 ug A5.
Sa higayon nga adunay Sinovac COVID-19 vaccines, posible nang masugdan ang pagbakuna sa anaa sa A4 priority group.
