Dili ‘bloodbath’ ang impeachment trial nga mahitabo sa Senado sama sa gihulagway ni Bise Presidente Sara Duterte, tungod kay alang kini sa pagpangita sa kamatuoran ug tulubagon.
Mao kini ang tubag ni House Deputy Majority Leader Lorenz Defensor, sakop sa House prosecution panel, sa pamahayag sa Bise Presidente nga dugoon ang impeachment trial.
Gikanayon pa niini nga ang prosecution ug defense panels kinahanglang andam sa pagpresentar sa ilang mga kaso ngadto sa Senado, nga maoy magsilbi nga impeachment court sa pag-abli sa 20th Congress.
Matod ni Defensor, mas sayon alang sa katawhan ang pagdawat sa bisan unsa nga resulta kon si Duterte mapamatud-an nga sad-an o wala.
Kahinumdoman nga niadtong Pebrero, sa wala pa ma-adjourn ang sesyon, giratipikahan sa House of Representatives ang Articles of Impeachment batok kang Duterte human kini naaprobahan sa majority sa mga miyembro.
Gipasanginlan si Duterte sa culpable violation of the Constitution ug betrayal of public trust tungod sa giingong sayop nga paggamit sa confidential funds sa Office of the Vice President ug isip secretary sa Department of Education, nga wala niya matubag sa mga hearing sa Kamara.
Gihatagan og gibug-aton ni Defensor nga ang impeachment sa ka taas nga opisyal dili usa ka judicial proceeding, apan usa ka proseso sa politika nga gidumala sa Konstitusyon ug sulod sa gahum sa lehislatura.
