CENTRAL VISAYAS-Nadakpan sa kapulisan ang walo ka mga miyembro nga nalambigit sa mga operasyon sa gun-for-hire kinsa gikataho nga sila ang responsable sa sunodsunod nga pagpamusil sa dakbayan sa Sugbo karong bag-o, matod sa kapulisan.
Matod ni Police Brigadier General Redrico Maranan, regional director sa Police Regional Office sa Central Visayas (PRO-7), atol sa press conference karung adlawa Lunes, Marso 10, kini nga mga indibidwal gikatahong sakop sa duha ka gun-for-hire nga grupo nga nag-operate sa Cebu City mga semana na ang milabay.
Dugang pa, nga nasikop ang mga suspek human sa sunodsunod nga operasyon sa kapulisan nga gihimo niadtong Enero 17 hangtod Marso 1.
Nasakmit sa mga otoridad ang walo ka armas ug nakuhaan og 166 gramos nga shabu.
Upat sa mga nasikop ang anaa sa PRO-7, samtang ang uban gitanggong na sa Bureau of Jail Management and Penology (BJMP).
Dugang pa, usa ka suspek ang nasikop atol sa hot pursuit operation sa Toledo City karong bag-o.
Gihatagan og gibug-aton ni Maranan nga iyang gimandoan ang mga lokal nga awtoridad sa pagpakusog sa operasyon batok sa mga gun-for-hire nga grupo, nga misangpot sa pagkasikop sa walo ka mga suspek.
Sa ilang talaan, labing minos lima ka insidente sa pagpamusil sa dakbayan sa Sugbo ang mahimong ipasangil sa maong mga grupo. Hinuon, wala gitino ni Maranan kung unsang mga insidente.
Kon wa pa madakpi ang maong mga suspek, si Maranan niingon nga posibleng maka-operate sila atol sa piniliay.
