Gisugyot ni Senate Finance Committee Chair Sherwin Gatchalian nga ang pipila ka mga kompanya mahimong mopatuman og upat ka adlaw nga workweek o work-from-home arrangements isip lakang sa pagdaginot sa enerhiya, taliwala sa mga kabalaka sa posibleng pagsaka sa presyo sa lana tungod sa tensyon sa Middle East.
Sumala ni Gatchalian, kini nga setup makatabang sa pagpakunhod sa konsumo sa gasolina ug diesel, labi na kung ang presyo sa krudo sa kalibutan magpadayon sa pagsaka.
Dugang pa sa senador nga ang gobyerno kinahanglan nga magtuon sa paghatag og mga subsidyo alang sa pagpalit og mga electric vehicle, labi na alang sa mga public utility vehicle (PUV), isip usa ka long-term nga solusyon aron makunhuran ang pagsalig sa nasud sa imported nga lana.
Sa pikas bahin, iya usab nga gikabutyag nga ang gobyerno mahimong mawad-an og hangtod sa P300 bilyon nga kita kon ang excise tax sa gasolina ihunong.
Hinuon, nanawagan ang senador alang sa hinanaling pagpatuman sa mga subsidyo sa gasolina pinaagi sa paggamit sa contingency fund sa Presidente aron maibanan ang epekto sa pagsaka sa presyo sa lana sa sektor sa transportasyon ug mga konsumidor.
Sumala ni Gatchalian, ang pagsuspenso sa excise tax kinahanglan nga usa ka katapusang paagi ug angay lamang nga ikonsiderar kon ang presyo sa krudo sa kalibutan moabot sa $80 matag bariles.
