Patay ang kapin sa usa ka tuig nga bata human kini malatayi sa usa ka dump truck sa nahitabong aksidente sa kadalanan sa Sitio Tangub, Barangay Lagtang sa dakbayan sa Talisay pasado alas 5:30 sa hapon niadtong Lunes, Marso 2, 2026.
Base sa eksklusibong pakighinabi sa Bombo Radyo Cebu News Team kang Jonathan “Joy” Tumulak, ang pangu sa City of Talisay – Traffic Operations and Development Authority (CT-TODA) nga sa ilang inisyal nga kasayuran nailhan ang biktima nga si “Belle Curiba Racal, 1 year and 5 months old nga batang babaye nga taga Purok Saging, Barangay Campo 4 sa susamang dakbayan diin namatay kini diha-diha dayon human nga malatayi sa ligid sa dump truck nga gimaneho ni Rolando Tapdasan, 52-anyos ug taga Barangay Guindarohan, Minglanilla.
Base sa panghitabo, niadtong higayuna samtang nga gadulhog sa national highway sa maong dapit ang motorsiklo nga gimaneho sa amahan sa biktima nga si Leylan Remigio Racal inubanan sa inahan sa bata nga si Joselin Curiba Racal sa dihang kalit sila nga natumba sa dalan duol sa truck kinsa padulong na unta moabante gikan sa paghunong niini kilid sa maong dalan.
Tungod niini nga nalabay ang bata paingon sa ligid sa truck nga miresulta sa hinadaling kamatayon niini. Mismong ang amahan nga maoy drayber kay nakurat pa sa panghitabo diin sa maong oras nga nahinabi sa Bombo Radyo Cebu News Team ang CT-TODA kay wala pa kiniy pamahayag nga gibuhian.
Padayon pa ang imbestigasyon sa Talisay City Police – Traffic Enforcement Unit sa maong panghitabo samtang ang driver sa truck kay temporary usang nakabalhug karon sa detention facility alang sa dugang nga imbestigasyon.
Nunot niini nga insidente, mipahimangno si Tumulak, sa mga motorista sa paglikay sa pagpasakay og mga bata sa mga motorsiklo ug pagsunod sa mga ordinansa og balaod aron maka likay sa disgrasya ug luwas ang mga bata.
