LAPU-LAPU CITY,CEBU- Napalgang wala nay kinabuhi ang usa ka 15-anyos nga Grade 10 student sulod sa ilang pinuy-anan sa Barangay Marigondon sa sayo sa buntag niadtong Hunyo 23, 2025.
Sa pakighinabi sa Bombo Newsteam kang Police Lt. Col. Christian Torres, tigpamaba sa Lapu-Lapu City Police Office (LCPO), nadiskubrehan ang biktima nga nagbuy-od sa salog, naghigda sa kaugalingong dugo, pasado alas 5:30 sa buntag.
Duol sa iyang lawas, nakit-an ang usa ka kalibre .45 nga pistola nga gituohang rehistrado sa iyang amahan nga usa ka aktibong sakop sa Philippine National Police (PNP) nga nadestino sa LCPO, PRO-7.
Sa dihang miabot ang mga imbestigador gikan sa Marigondon Police Station, gideklarar sa medical team sa Lapu-Lapu City Health Office nga patay na ang biktima sa mismong dapit sa insidente.
Matud ni Torres, ang amahan sa biktima nga usa ka Police Master Sergeant, misaysay nga hilomon ang iyahang anak, apan, dali ra nga masuko.
Dugang pa, sa wala pa ang insidente, gimaymayan sa inahan ang bata kay mouli og kadlawon na.
Kini tungod kay ang klase sa bata buntag, busa kinahanglan niya nga andamon ang iyang kaugalingon ug makatulog og sakto aron andam sa pa-eskwela.
Gibutyag usab sa amahan nga ang maong armas gibutang sa usa ka drawer nga adunay lock, apan, nakuha kini sa bata pinaagi sa pagpugos og abli sa drawer.
Gidugang pa ni Torres nga posibleng ang biktima nakakat-on sa paggamit sa armas pinaagi sa social media, ilabi na nga dali ra karon sa kabatan-onan ang makakita og mga video kabahin sa paggamit sa pusil.
Sa pagkakaron, padayon pa ang imbestigasyon sa kapulisan. Wala nila gisalikway ang posibilidad sa paghikog o foul play samtang nagpaabot sa resulta sa forensic analysis ug dugang pakisusi.
