Nakabalhin na sa Bayanihan Village sa dakbayan sa Mandaue ang anaa sa 16 ka pamilyahan gikan sa Barangay Alang-alang ug Umapad nga nawad-an sa mga panimalay atol sa pag-igo sa Bagyong Tino niadtong Nobyembre 4.
Gani sumala pa ni Mandaue City Mayor Thadeo “Jonkie” Ouano nga gihinaot sa iyang administrasyon ang saktong pagpahimutang sa mga pamilya ngadto sa Bayanihan Village sa mga pre-fabricated smart homes.
Gawas niini, nakadawat sab ang mga pamilya sa mga relief packages nga adunay sulod sama sa banig, bugas, balde, ug uban pang batakang panginahanglanon nga gipaagi sa buhatan sa Mandaue City Social Welfare Services Office (CSWSO).
Ang mga pamilya kay mipadayag sa ilang pasalamat sa Kagamhanang Dakbayan sa Mandaue sa pag-amuma kanila diin sila gipahimutang sa luwas, hapsay, ug maayong lugar kapuy-an samtang hinay-hinay pang mibangon sa kalisud.
