Nakaangkon og samad pinusilan ang 22-anyos nga lalaki human kini gipusil sa wala pa mailhing nag-inusarang suspetsado sulod sa computershop pasado alas 10 sa gabii sa Sitio Upper Santo Niño, Barangay. Kinasang-an ning dakbayan sa Sugbo.
Giila ang biktima nga si Christian Laspoña Molina, nagpuyo sa E. Sabellano St. Barangay. Poblacion Pardo, dakabyan sa Sugbo.
Sa inisyal nga imbistigasyon sa Inayawan Police Station 7, Cebu City Police Office nga samtang nagduwa og computer ang biktima kalit lang nga miabot suspek ug dayong gipusil sa likod nga bahin sa liog sa biktima.
Ingon man nga gisakay dayon sa patrol car si Molina pag-abot sa mga miresponding kapulisan paingon sa Cebu City Medical Center.
Nakuha na sa mga kapulisan ang kopya sa CCTV footage, diin nakita nga ang nag-inusarang suspetsado kay nagsul-ob og Blue Jacket, Black Short, Blue Bonet, kinsang dali nga misibat human sa gihimo nga krimen.
Tanang anggulo ang subayon sa kapulisan aron matino kon unsa ang hinungdan sa pagpusil sa maong biktima. | via Bombo Koky Cabatingan
