CEBU CITY-Unom (6) ka mga Sitio sa lima (5) ka barangay dakbayan sa Sugbo ang ipaubos na sa granular lockdown sugod karong adlawa. Kini ang nakab-ot nga desisyon human nga gitutukan sa Inter Agency Task Force (IATF) ang mga barangay nga tag-as og kaso sa covid-19.
Ang 6 ka Sitio sa lima ka mga barangay mao ang :Sitio Eyha sa Barangay Guadalupe, Balaga Drive hangtud sa Sitio Cekalco sa Barangay Labangon, Tuada Compound sa Barangay Tisa, Sitio San Isidro ug Abellanosa Compound sa Barangay Quiot, ug C. Mina Extension sa Barangay Mabolo.
Subay niini, gitataw usab ni Cebu City Mayor Eduardo Labella pinasikad sa iyang Executive Order nga dili na magamit ang Quarantine Pass (QP)sa mga sitio nga ipaubos sa lockdown.
Kini gumikan kay kung magamit pa og QP way gamit ang lockdown. Gani, lakip usab sa mga dili tugutan nga makagawas mao ang mga Authorized Person Outside Residence (APOR) ingon man mga essential workers. Ipaubos kini sila sa lockdown sulod sa 14 diyas samtang magpadayon usab ang contact tracing.
Una na usab nga gipasalig sa city government nga samtang nakalockdown ang naasoy nga mga sitio, maghatud og ayuda ang gobyerno ngadto kanila nga makaigo sulod sa 14 diyas. | via Bombo Jun Salde
